14 vite nga ndarja nga jeta e Kryegjyshit Botëror Bektashian

Më 2 Prill të vitit 2025, komuniteti bektashian anembanë botës ndalet në reflektim dhe lutje për të përkujtuar një nga figurat më të ndritura të historisë sonë shpirtërore – Haxhi Dede Reshat Bardhin, Kryegjyshin Botëror që u nda nga jeta në këtë datë, 14 vite më parë.

Jeta dhe vepra e Tij janë dritë e pashuar në altarin e bektashizmit. I lindur në një familje të thjeshtë dhe të devotshme në Veri të Shqipërisë, ai rriti në zemrën e tij dashurinë për Zotin, për të vërtetën dhe për njeriun. Me një besim të palëkundur dhe përkushtim të rrallë, ai i kushtoi jetën shërbimit në rrugën e Hakut dhe udhëhoqi ringritjen e bektashizmit në kohë sfiduese për besimin.

Si prijës shpirtëror, Dede Reshati e përhapi dritën e dashurisë bektashiane në mbarë trojet shqiptare dhe më gjerë, duke ndërtuar ura miqësie dhe mirëkuptimi ndërmjet besimeve dhe kombeve. Ai ishte shembull i gjallë i durimit, mençurisë dhe dashurisë së pakushtëzuar – vlera që janë zemra e teqesë dhe mësimeve të Haxhi Bektash Veliut.

Nën udhëheqjen e Tij, besimtarët bektashianë panë jo vetëm rindërtimin e strukturave të kultit, por edhe ringjalljen e shpresës, të bashkimit dhe të identitetit shpirtëror.

Bashkësia Fetare Bektashiane – Kërçovë, në këtë përvjetor të rëndësishëm, shpreh përulësisht mirënjohjen për trashëgiminë që na la Dede Reshati. Ne përulemi me dashuri përpara kujtimit të Tij dhe premtojmë të ecim në gjurmët që Ai hapi me shpirt të pastër e me zemër të madhe.

Qoftë kujtimi i Tij i bekuar në çdo sofrë bektashiane.
Qoftë fjala e Tij frymëzim për brezat që vijnë.
Qoftë paqja e Tij dritë në rrugën tonë të përbashkët!